伊巴弗爆銀河大騷盛宴

2018-07-04 15:46:22 来源:互联网

今日世盃休戰,但美職有連場好戲,阿King都搵到心水。當中洛杉磯銀河主場鬥華盛頓聯隊,銀河前鋒伊巴謙莫域可能見祖國瑞典喺世盃表現出色激發鬥志,今場有力繼續為球隊數胡,中位數3/3.5球嘅大盤有2.02倍值博。

(無綫myTV SUPER 303周四早上10時30分直播)

伊巴謙莫域今屆無緣世盃,惟有以球迷身份支持祖國,見到班昔日隊友咁落力,佢都唔好意思Hea,近兩仗同樣梅開二度,狀態弗爆,加上銀河近期主場大踢進攻足球,近5仗主場全開3球或以上,可見火力有番咁上下。不過講到近排美職受人注視嘅,就必定係華盛頓聯隊,皆因佢哋剛宣布獲32歲英格蘭前鋒朗尼加盟,簽約3年半,嚟緊將着起9號波衫,記者會上朗尼就講明:「我加盟美職係嚟贏波,唔喺嚟養老!」不過佢今仗趕唔切為球隊上陣,唔可以同伊巴同場較技。華盛頓聯隊近況低迷,今季11場作客都有失波,近7仗作客有6次開3球或以上,面對好攻得嘅銀河,隨時輸多幾粒。

明尼蘇達聯入局慢追半和
較早開波仲有明尼蘇達聯對FC多倫多,明尼蘇達聯主場入局較慢,近6主場全開半和,再追。(無綫myTV SUPER 302周四早上7時直播)最後FC達拉斯主場鬥阿特蘭大聯,阿特蘭大聯近期作客照搶,近7次作客都先取得入波,呢場捧佢哋嘅第一隊入球唔好錯過。

(無綫myTV SUPER 303周四早上8時直播)